بانگكوك قالاسىندا قازاقستاننىڭ تايلاندتاعى ەلشىلىگىنىڭ باستاماسىمەن بۇكىلالەمدىك بۋدديستتەر قوعامداستىعىنىڭ شتاب-پاتەرىندە الەمدىك جانە ءداستۇرلى دىندەر ليدەرلەرىنىڭ VI سەزىنىڭ قورىتىندىلارىنا ارنالعان «قازاقستان مەن تايلاند: كونفەسسياارالىق كەلىسىمگە قوسقان ۇلەسى» اتتى حالىقارالىق كونفەرەنسيا ءوتتى.
كونفەرەنسيانىڭ نەگىزگى يدەياسى - تايلاندتىڭ جۇرتشىلىعىنىڭ نازارىن قازاقستان رەسپۋبليكاسىنىڭ ءارتۇرلى كونفەسسيالار اراسىنداعى ديالوگتى دامىتۋ جانە جاھاندىق بەيبىتشىلىك پەن كەلىسىمدى نىعايتۋداعى ءوزارا ءىس-قيمىلىن كۇشەيتۋ جونىندەگى قىزمەتىنە اۋدارۋ، سونداي-اق وسى سالاداعى تاجىريبە الماسۋ بولدى. كونفەرەنسياعا مەملەكەتتىك ورگانداردىڭ، قوعامدىق جانە اكادەميالىق توپتاردىڭ، ءدىني ۇيىمداردىڭ، سونداي-اق تايلاندتىڭ ديپلوماتيالىق كورپۋسى وكىلدەرى قاتىستى.
كونفەرەنسيادا ەلشى راۋشان ەسبولاتوۆا قۇتتىقتاۋ ءسوزىن سويلەپ، تىڭداۋشىلاردى الەمدىك جانە ءداستۇرلى دىندەر ليدەرلەرىنىڭ VI سەزى جۇمىسىنىڭ قورىتىندىلارىمەن تانىستىردى. اتاپ ايتقاندا، دەكلاراسيانىڭ نەگىزگى قاعيدالارى، سونداي-اق پلەنارلىق جانە سەكسيالىق وتىرىستارىنىڭ تاقىرىپتارى اشىلدى. قازاقستان رەسپۋبليكاسى پرەزيدەنتىنىڭ ۇسىنعان «مانيفەست. «بەيبىتشىلىك. XXI عاسىر» اتتى قۇجاتىنا ەرەكشە نازار اۋدارىلدى.
سونىمەن بىرگە، ءىس-شارا قاتىسۋشىلارى قازاقستان رەسپۋبليكاسى پرەزيدەنتىنىڭ ءتۇرلى دىندەر، مادەنيەتتەر مەن وركەنيەتتەر اراسىنداعى بەيبىتشىلىك، كەلىسىم جانە جەمىستى ديالوگتى قامتاماسىز ەتۋگە باعىتتالعان حالىقارالىق پلاتفورما قۇرۋ جونىندەگى بىرەگەي باستاماسىن ىسكە اسىرۋ ناتيجەسى رەتىندەگى سەزدىڭ تاريحىمەن تانىستىرىلدى.
اتالعان حالىقارالىق ءىس-شاراعا تايلاندتىڭ اتىنان قاتىسقان بۇكىلالەمدىك بۋدديستتەر قاۋىمداستىعى پرەزيدەنتىنىڭ كەڭەسشىسى ت.سۋچاريكۋل جانە دۇنيەجۇزىلىك بەيبىتشىلىك ۋاكىلى كەڭسەسىنىڭ باس حاتشىسى پ. توۆيۆيچ الەمدىك جانە ءداستۇرلى دىندەر ليدەرلەرىنىڭ VI سەزى جۇمىسىنا قاتىستى ءوز پىكىرلەرىمەن ءبولىستى. دەلەگاتتار سەزدىڭ ءوزارا سەنىم مەن سىيلاستىق اتموسفەراسىن قالىپتاستىرۋ ماقساتىندا ءدىني جانە ساياسي ليدەرلەردىڭ كۇش-جىگەرىن بىرىكتىرۋ بويىنشا باستاماسىنا قولداۋ ءبىلدىردى. بۇل ولاردىڭ پىكىرىنشە تارتىستى جاعدايلادى بولدىرماۋعا كومەكتەسەدى. سونداي-اق، تايلاند وكىلدەرى مۇنداي كەڭ اۋقىمدى شارانى ۇيىمداستىرۋدىڭ جوعارى دەڭگەيىن اتاپ ءوتتى.
تايلاند كورولدىگى مادەنيەت مينيسترلىگىنىڭ ءدىن ىستەرى دەپارتامەنتىنىڭ وكىلدەرى ءوز كەزەگىندە، كونفەسسياارالىق كەلىسىمدى قامتاماسىز ەتۋدىڭ ۇلتتىق تەتىكتەرى تۋرالى باياندادى. قازىرگى تاڭدا كورولدىكتە 15 ءدىني ۇيىمدار رەسمي تىركەلگەن، ال مەملەكەت مويىنداعان نەگىزگى دىندەر بۋدديزم، يسلام، يندۋيزم، سيكحيزم جانە حريستيان بولىپ تابىلادى.
تۇساۋكەسەردەن كەيىن جەمىستى پىكىرتالاس ءوتىپ، ونىڭ بارىسىندا ءىس-شاراعا قاتىسۋشىلار ءتۇرلى دىندەر مەن مادەنيەتتەر اراسىنداعى ديالوگتى دامىتۋ وزەكتىلىگى، سونداي-اق بۇل تۇرعىداعى استانادا وتكەن سەزد ءرولىنىڭ ماڭىزدىلىعى تۋرالى كەلىسىمگە كەلدى.
ەركىن قالدان
